प्रतिक मयेकर, पालघर
बोईसर औद्योगिक परिसरात रोजच्या रोज ओव्हरलोड पिकअप वाहनांचा खेळ उघडपणे सुरू असून, प्रशासनाचे डोळे मात्र झाकलेले दिसतात. के.सी. कम्प्युटराईज्ड वे-ब्रिजवर झालेले वजन हे संपूर्ण बेफिकीरीचे जिवंत उदाहरण आहे. वजनपत्रकांवर नमूद आकडे हे केवळ वाहनाचा भार दाखवत नाहीत, तर वाहतूक विभाग आणि आरटीओ यांची निष्क्रियता व जबाबदारीचा तोल बुडाल्याचे स्पष्ट करतात. औद्योगिक माल, लोखंडी पत्रे आणि जड साहित्य घेऊन जाणारी ही वाहने क्षमतेच्या पलीकडे माल लादून रस्त्यावर निघतात, पण तपासणीसाठी एकही अधिकारी दिसत नाही. हे चित्र फक्त बोईसरपुरते मर्यादित नाही, तर संपूर्ण तारापूर औद्योगिक पट्ट्याचे वास्तव आहे.
आरटीओ आणि वाहतूक विभागाच्या नावावर असलेले फलक आणि कार्यालये जणू फक्त महसूल गोळा करण्यासाठीच आहेत, कारण रस्त्यावर त्यांच्या कारवाईचा कोणताही ठसा दिसत नाही. ओव्हरलोड वाहनांवर कारवाई करण्याऐवजी ही अधिकारी मंडळी दंड वसुलीच्या राजकारणात गुंतलेली आहेत. परिणामी, वाहनचालक आणि मालमालक दोघेही नियमांना धाब्यावर बसवून निर्भयपणे धावत आहेत. सिस्टमनेच डोळेझाक केली की गुन्हेगार मोकळे होतात, हेच येथे घडत आहे.
पिकअप वाहनांची क्षमता मर्यादित असताना, त्यात औद्योगिक भार, स्टीलचे पत्रे, लोखंडी तुकडे, पाईप्स अशा वजनदार वस्तू चढवल्या जातात. वाहनांचे सस्पेंशन, ब्रेक आणि टायर यांचा तोल बिघडतो, आणि अपघात झाल्यास दोष मात्र ड्रायव्हरवर ढकलला जातो. पण प्रश्न इतकाच आहे — ड्रायव्हरला ओव्हरलोड चालवायला भाग पाडणारे मालक आणि त्यांना मोकळीक देणारे आरटीओ अधिकारी यांच्यावर कारवाई कधी होणार? अपघात झाल्यावर “चौकशी सुरू आहे” या सरकारी वाक्याच्या मागे पुन्हा सर्व काही दडपवले जाते.
के.सी. वे-ब्रिजवरील वजनपत्रक हे दस्तऐवजी पुरावे आहेत की, प्रशासन समोर असलेले वास्तवही नाकारत आहे. सकाळी घेतलेल्या तीन रिसीट्समध्ये वजनाचा तफावत स्पष्ट असून, ही वाहने कुणाच्या परवानगीने रस्त्यावर फिरतात हा प्रश्न अधिक तीव्रतेने उपस्थित होतो. बोईसरसारख्या औद्योगिक क्षेत्रात सुरक्षा आणि नियम हे केवळ कागदापुरते मर्यादित झाले आहेत. रस्त्यांवर तपासणीसाठी ना वाहन निरीक्षक, ना आरटीओ कर्मचारी — जणू सगळं काही स्वयंचलित पद्धतीने चालतंय. पण या स्वयंचलित व्यवस्थेच्या मागे आहे प्रशासनाचा सुस्तपणा आणि भ्रष्ट शिथिलता.
जनतेचा प्रश्न आता सरळ आणि थेट आहे — प्रशासन या ओव्हरलोड पिकअप्सकडे दुर्लक्ष का करतंय? प्रत्येक वेळी एखादा अपघात झाला की दंड, चौकशी आणि निवेदन यांचा नुसता कागदी खेळ सुरू होतो; पण रस्त्यावर परिस्थिती तशीच राहते. हेच चित्र आज पुन्हा दिसत आहे. बोईसरमधील वे-ब्रिजवर घेतलेले हे वजन फक्त वाहनाचे नाही, तर संपूर्ण प्रशासनाच्या जबाबदारीचे वजन आहे — आणि ते प्रशासन आता हे वजन पेलू शकत नाही.
या ओव्हरलोड पिकअप्समुळे रस्त्यावरील जीव धोक्यात आले आहेत. कामगार, पादचारी आणि इतर वाहनचालक रोज याच मार्गावरून जातात, पण त्यांच्या सुरक्षिततेची कोणालाच चिंता नाही. आरटीओ आणि वाहतूक विभागाने आता तरी आपली जबाबदारी ओळखावी, कागदी कारभार सोडून प्रत्यक्ष तपासणी सुरू करावी, अन्यथा बोईसरमधील रस्ते केवळ औद्योगिक मालाच्या नव्हे तर निष्काळजीपणाच्या भाराखाली कायमचे दबून जातील.
