पालघर शहरातील वाहतूक व्यवस्थेवर प्रश्नचिन्ह; ओव्हरसीट रिक्षा, ओव्हरलोड वाहने आणि अतिक्रमणामुळे नागरिक त्रस्त!
पालघर शहरात वाहतूक नियमांची उघडपणे पायमल्ली होत असून, वाहतूक पोलीस आणि RTO प्रशासनाकडून प्रभावी कारवाई होत नसल्याचा आरोप नागरिकांकडून केला जात आहे. शहरात ३-सीटर व ६-सीटर रिक्षा क्षमतेपेक्षा जास्त प्रवासी घेऊन सर्रास फिरताना दिसतात. अनेक वेळा ही वाहने वाहतूक पोलिसांसमोरून जात असतानाही त्यांच्यावर कारवाई होत नसल्याचे चित्र दिसत आहे.
याचबरोबर छोट्या पिकअप, टेम्पो आणि ट्रकमध्ये क्षमतेपेक्षा जास्त माल भरून वाहतूक केली जात आहे. त्यामुळे वाहनांचा वेग कमी होतो, रस्त्यांवर वाहतूक कोंडी निर्माण होते, रस्त्यांचे नुकसान होते आणि अपघाताचा धोका वाढतो. पालघर शहरात वारंवार होणाऱ्या अपघातांमागे अशा नियमभंगाचाही मोठा वाटा असल्याची भावना नागरिकांनी व्यक्त केली आहे.
नागरिकांचा आरोप आहे की, पालघर RTO कार्यालयाचे अधिकारी गुरुवार आणि शुक्रवारी तपासणीसाठी येतात, मात्र ओव्हरसीट रिक्षा, ओव्हरलोड वाहने, फिटनेस, परमिट, विमा, PUC आणि इतर कागदपत्रांची प्रभावी तपासणी होताना दिसत नाही. त्यामुळे नियमांचे पालन करणाऱ्या वाहनचालकांमध्ये नाराजी आहे.
तसेच शहरातील अनेक ठिकाणी बेकायदेशीर पार्किंग, रस्त्यांवरील अतिक्रमण आणि अनधिकृत वाहतूक सुरू असल्याने वाहतूक कोंडी वाढत आहे. या प्रकारामुळे सर्वसामान्य नागरिक, व्यापारी आणि विद्यार्थी यांना रोज मोठा त्रास सहन करावा लागत आहे.मोटार वाहन कायद्यानुसार ६-सीटर रिक्षामध्ये फक्त मंजूर क्षमतेइतकेच प्रवासी वाहून नेण्याची परवानगी आहे. क्षमतेपेक्षा जास्त प्रवासी घेणे हा कायद्याचा भंग असून अशा वाहनांवर दंडात्मक कारवाई होऊ शकते. तसेच वैध परमिट, फिटनेस, विमा आणि PUC नसलेल्या वाहनांवरही मोटार वाहन अधिनियमांतर्गत कारवाईची तरतूद आहे.
पालघर वाहतूक पोलीस, पालघर RTO आणि पालघर नगर परिषद यांनी संयुक्त मोहीम राबवून बेकायदेशीर अतिक्रमण हटवावे, अवैध पार्किंग बंद करावी, ओव्हरसीट रिक्षा आणि ओव्हरलोड वाहनांवर कठोर कारवाई करावी, तसेच शहरातील वाहतूक व्यवस्था शिस्तबद्ध करावी, अशी नागरिकांची जोरदार मागणी आहे.रस्ते सर्वसामान्य जनतेचे आहेत. त्यामुळे कायद्याची अंमलबजावणी सर्वांवर समानपणे होणे आवश्यक आहे. नियम मोडणाऱ्यांवर कठोर कारवाई झाल्यासच पालघर शहरातील वाहतूक व्यवस्था सुधारेल आणि अपघातांचे प्रमाण कमी होईल.
जावेद मजीद लुलानिया
संपादक – पालघर नागरिक
संस्थापक – NH-48 Information Group
जिल्हाध्यक्ष – नव भारतीय शिव वाहतूक सेना, पालघर जिल्हा
